dekanozishvili-winery

დეკანოზიშვილის მარანის ფილოსოფია განსხვავებული ღვინის შექმნაა. ამიტომ, ჩვენ ღვინოს ორი  მეთოდის, ქართული ქვევრის და იტალიური აპასიმენტოს შერევით ვაყენებთ და ასე ვქმნით ტრადიციულ ღვინოს ახლებური ხელწერით. 

ჩვენი ფლაგმანი ღვინო, „დეკანოზიშვილის წითელი“, სამი განსხვავებული ყურძნის, საფერავის, შავკაპიტოსა და ოცხანური საფერეს კუპაჟით კეთდება. ჩვენს ვენახებში, თითოეული მათგანი განსაკუთრებული მზრუნველობით, ხელით იკრიფება. სამივე ყურძენი კარგად გამოხატავს თოხლიაურის ტერუარს და უნიკალურ ხასიათს აძლევს ღვინოს. ამ ტრიოში, საფერავი ღვინის მთავარი ხერხემალია, ის ინტენსიურობას და მძლავრ სტრუქტურას სძენს ღვინოს, ასევე პასუხისმგებელია მუქ ფერსა და შავი ხილის არომატებზე. შავკაპიტო ხავერდოვან ტანინებს და დელიკატუობას ჰმატებს, ხოლო ოცხანური საფერე კი ცოცხალი მჟავიანობით ამდიდრებს ღვინოს.

„დეკანოზიშვილის წითელის“ დაღვინების გზა ასეთია: იტალიური აპასიმენტოს ინსპირაციით, ჩვენ ყურძენს ვკრეფთ და განსაკუთრებულ პირობებში, რამდენიმე თვის განმავლობაში ვაშრობთ/ვაქიშმიშებთ, რათა შაქრის და არომატების მაქსიმალური კონცენტრაცია გადმოვიტანოთ ღვინოში, რომელიც მას მეტ სიღრმეს და კომპლექსურობას შესძენს. დუღილის პროცესი, ტრადიციული მეთოდით ქვევრებში მიმდინარეობს, სამივე ყურძენი ქვევრებში იწურება და ღვინდება. დაახლოებით ექვსი თვე ვაყოვნებთ ქვევრში კანთან ერთად, რაც მეტ ტანინს და ინტენსიურ არომატებს სძენს ღვინოს და შემდგომ უკვე შვიდი თვის განმავლობაში სხვა ქვევრებში გადაგვაქვს დასვენებისა და ჰარმონიზაციისთვის. 

ქვევრის მერე, „დეკანოზიშვილის წითელი“, 18 თვის განმავლობაში ფრანგულ და ამერიკულ, სხვადასხვა ასაკის და გამოწვის მუხის კასრებში ვარგდება, რაც ღვინოს უფრო დახვეწილს ხდის და სანელებლების, ვანილისა და სიგარის ტონებს აძლევს. შემდეგ უკვე იწყება სკურპულოზური შერევა/ბლენდინგის პროცესი და ბოთლებში ჩამოსხმა. „დეკანოზიშვილის წითელი“ ბოთლებში განაგრძობს დავარგებას და მხოლოდ 2-3 წლის შემდეგ გამოდის ბაზარზე.

„დაკანოზიშვილის წითელში“, საბოლოოდ გვხვდება შავი ხილის, კენკრის, ქლიავის და ლეღვის ჩირის, სანელებლების, კაკლის და თამბაქოს არომატები. ტექსტურა ხავერდოვანი აქვს, დაბოლოება კი ხანგრძლივი და სასიამოვნო. იდეალურად იცავს ბალანსს სავსე სხეულსა და ელეგანტურობას შორის.